Fluttur að heiman!

Þar sem dóttir mín er nýlega flutt að heiman, ætla ég að flytja til hennar, hingað.

Fært undir . Engin ummæli »

Vér snyrtipinnar.

Í viðtali við Trausta Valsson skipulagsfræðing í fréttatíma RÚV rétt fyrir páska komu fram afar áhugaverðar skoðanir hans á stóriðjumálum hér á landi. Trausti hefur oft komið fram með frumlegar hugmyndir í skipulagssmálum eins og fram kemur í bók hans “Skipulag byggðar á Íslandi” sem ég keypti og las fyrir nokkrum árum. Rétt er að taka fram strax í upphafi að hér er ekki á ferðinni hinn almenni gáfumaður sem er með sitt annað lögheimili á kaffihúsi í 101 Reykjavík. Trausti er alvöru fallbyssa og því full ástæða til að hlusta með opnum huga á það sem hann hefur til málann að leggja. Eins og segir á bókarkápu þá lauk hann námi af skipulagslínu TU í Berlín og lauk þar að auki doktorsnámi í umhverfisskipulagi við UC Berkley 1987, fékk hlutadósetnsstöðu við HÍ 1988 og var skipaður í fyrstu stöðu prófessors í skipulagsfræði við HÍ árið 2000.

Eitthvað segir mér að þetta viðtal við Trausta hafi ekki náð til mjög margra og því hafi boðskapurinn tapast að hluta til í öllu því fréttaáreiti sem við verðum fyrir í útvarpi, sjónvarpi og blöðum. Því ætla ég að birta hér orðréttar tilvitnanir í viðtalið við Trausta.

Í inngangi er vitnað í Trausta þar sem hann hvetur stjórnvöld að “sameina stóriðjustefnu og byggðastefnu” og “telur skynsamlegt að starfsemi Alcan sem nú er í Straumsvík verði flutt út á land. Þannig megi treysta byggð sem annars sé í hættu.” “Hann vísar m.a. til þess að án uppbyggingar á Austurlandi hefði nánast blasað við algert hrun í landsfjórðungnum.”

Síðan taka við almennar vangaveltur um stóriðju á Íslandi og þá koma fram ansi athyglisverðar skoðanir skipulagsfræðinsins á viðhorfi almennings. Hann telur að líta eigi til skipulags í víðu samhengi, ekki einungis í einu bæjarfélagi og er þá að vitna til Hafnarfjarðar. Síðan segir hann, og takið nú eftir: “En almennt séð þá finnst mér í sambandi við þessa stóriðju sem fólk er virkilega orðið næmt fyrir, útlitslega og að einhverju leiti mengunarlega, þó að hún sé nú ekki eins mikil og hún var hérna áður og reyndar og mjög lítil, held ég. Þá er, held ég, miklu skynsamlegri skipulagsstefna og byggðastefna að bjóða þessum útlendingum, því þeir virðast alveg vera tilbúnir með það að vera með þetta úti á landi þar sem þetta er þá ekki fyrir augunum á meginhluta þjóðarinnar.” Hann bendir á að álverið á Reyðarfirði hafi, hvað byggðirnar snertir, verið mikill ávinningur fyrir austurland. Við hafi blasað hrun þar og missir eigna. Trausti minnir á að eitt sinn hafi það verið stefna stjórnvalda að stórir orkunotendur yrðu staðsettir á landsbyggðinni, en andbyr hafi hrakið þau frá henni. Nú segist stjórnvöld enga stóriðjustefnu hafa og vísi á einstök sveitarfélög. “Og þá er það sko enginn sem að segir, ja það er skynsamlegra fyrir bara Ísland í heild sinni að þessi óþrifalegri starfsemi í iðnaði sé frekar þar sem að einginn nánast veit af henni og þar sem að virkilega þörf á einhverjum aðgerðum til þess að bjarga byggðinni.”
Ja, það kom að því að einhver þyrði að segja það sem í huga þeirra býr. Þolmörk skrælingjanna á landsbyggðinni gagnvart mengun og skít eru hærri en snyrtipinnanna í 101. Fegurðarskyn höfuðborarbúa er á svo háu plani að þeir þola ekki þá sjónrænu mengun sem hlýst að stórum verksmiðjubyggingum. Það veldur þeim andlegri og líkamlegri ógleði. Út á land með ósómann. Þar búa hvort sem er bara sóðar. Þar má hlaða upp ljótum og löngum kerskálum. Þeir falla inní landslagið á landsbyggðinni sem er ljótt hvort sem er. Hið póstmóderníska form Esjunnar má ekki við því að hinar skáhöllu línur og bogadregnu ásar hennar þverist af lóðréttum línum skorsteina álversins og hinar löngu láréttu kerskálar brjóti upp ljóðræana hrinjandi Skarðsheiðarinnar. Þrátt fyrir það eru “fjólubláir draumar” íbúa Reyjavíkur orðnir gulgrænir af mengun uppúr borholum Hellisheiðarvirkjunar sem er orðin langt yfir viðmiðunarmörkum, margoft. Svifriksmengun yfir hættumörkum oft á ári, hávaðamengun að gera jafnvel heyrnarsljóa óða, fullfrískt og fatlað fólk lamið, sparkað og barið til óbóta, nótt sem dag, virka sem helga, konum nauðgað bæði á “skemmtistöðum” höfuðborgarinnar sem og í “listrænum” húsasundum miðborgarinnar og í heimahúsum. Og dópdrullan flæðir stjórnlaust um allt í höfuðborginni. Sendið okkur bara álverin. Þið getið þá skimað yfir ástandið hjá ykkur í gegnum fagurfræðileg og listræn gleraugu og reynt að finna út úr því hvort einhver munur er á kúk og skít. Ég held ekki. Lyktarskynið er svipað og nefin áþekk.

Það rignir bara uppí sum þeirra.

Fært undir . Engin ummæli »

Nótt í skóginum.

Ég er uppí skógi í sumarbústaðnum. Föstudagurinn langi liðinn, líka landsleikurinn við Póverja í handboltanum. Kominn laugardagur og klukkan að verða tvö að nóttu. Alger kyrrð í skóginum. Sit upp við dogg og les “Þegar ég varð óléttur. Úrval úr ritum Þórbergs Þórðarsonar” með Stairway to heven með Led Zeppelin rúllandi hljóðlega undir þar sem allir eru sofnaðir nema ég. Úti er 6 stiga frost, blanka logn, örlítill snjór liggur yfir trjánum og skógarbotninum sem blasir við út um gluggna. Espresso í bolla og Whisky í glasi.

Fréttir kl. 02.00

Les um óskir snillingsins Þórbergs um framkvæmd sinnar eigin jarðarfarar. Honum er nett sama hverjir koma til með að fylgja honum til grafar, ef einhverjir, fáir eða margir, skítugir drykkjuræflar eða sveitalimir, hórur eða þjófar. En “Aðeins vildi hann mega bera fram þá einlægu bæn tilþessað auka ekki á óþægindi sín eftir dauðann, að Framsókarmenn og sósíaldemókratar komi sér þar fyrir í prósessíunni, sem minnst beri á þeim.”

Skynsamur maður Þórbergur.

Sopi af svörtu og gylltu. Þettta gerist ekki betra. Klukkan farin að ganga þrjú. Í útvarpinu er hvíslað Because með Bíltlunum. Hvaða galdramaður er á tökkunum hjá RÚV? Svo My sveet Lord. Ja hérna! Ég þarf greinilega að gera meira af því að vaka frameftir um helgar og hlusta á útvarpið. Ég kemst að því að í gangi er þáttur um sögu Bítlanna. Ég heiti Gunnar og ég er aðdáandi. Þáttarstjórnandinn gerir tilraun til að setja saman síðustu plötu Bítlanna sem aldrei var gefin út, með því að raða saman nokkrum af fyrstu lögunum sem þeir gáfu út hver í sínu lagi eftir að uppúr samstarfinu slitnaði. Skemmtilegar vangaveltur á ferðinni hjá honum. …. og nú kemur “The long and winding road”

Ég sé fram á langa nótt.

Þórbergur, Expresso, Bítlarnir, Whisky og skógurinn.

Er til betri blanda?

Fært undir . 1 ummæli »

Rigning fram á haust!

Framsókn með EINN þingmann hér í Norð-Austur kjördæmi skv. nýrri könnun! Ég svaf með besta móti í nótt. Mér til ánægju var farið að snjóa nú í morgun þegar ég vaknaði. Stórfjölskyldan með matarveislu í sumarbústaðnum í kvöld. Kannski fæ ég stórt páskaegg. Ætlar þessari gleði ekki að linna?

Sjaldan hef ég lesið niðurstöðu skoðunarkönnunar um fylgi pólitískra flokka af jafn mikilli áfergju og gleði og þá sem birtist fyrir Norð-austurkjördæmi í gær.

Ég reyndi að stökkva hæð mína af gleði.

Ef þetta fer eftir, þá má rigna í allt sumar, mín vegna.

Fært undir . Engin ummæli »

Alltaf eins?

Alveg er þetta veður makalaust. Uppúr hádegi sl. laugardag fór ég ásamt félaga mínum og syni hans á snjósleðum inná austurhálendið, í skálann okkar, Bjarnahíði á Hvíldarklettum á milli Hornbrynju og Brattháls. Besta veður, bjart en nokkur vindur. Um kvöldið og fyrripart nætur gerði hávaða rok í þess orðs fyllstu merkingu. Þá var gott að liggja uppí koju með bók í hönd og hristast taktfast með húsinu. Funhiti og nóg brenni. Vakna um miðja nótt við það að hitinn er kominn í efri mörk, nánast allir gluggar lokaðir vegna hvassviðrisins þegar farið var að sofa. Allir gluggar rifnir upp en ekkert gerist þar sem úti er blankalogn. Smátt og smátt dregur niður í kamínunni og svefninn nær yfirhöndinni aftur. Kaffið og appelsínið frá kvöldinu fer að segja til sín um kl. 6.00 Heljarátök að smokra sér úr svefnpokanum og í einhverja leppa og koma sér út í kaldan morguninn. Í glansbjörtu veðri og hita þega líður á daginn, er þeyst eftir endilöngum Þrándarjökli, yfir Hornbrynju, norður allan Hallormsstaðaháls og uppí liðuga 1000 metra hæð á fjallinu Kistufelli. Þaðan sér annars vegar yfir allan Breiðdalinn, suður í Papey og hinsvegar alla leið til Herðubreiðar, Snæfells og Kverkfjalla. Einstakur staður. Harðsperrur teknar út á mánudegi og þriðjudagurinn líður í 18 stiga hita og fjöllin í Fáskrúðsfirðinum standa á haus í logninu allan daginn.
Núna er klukkan 23.28 og hitinn úti er 16 gráður!
Það spáir frosti og snjókomu hér fyrir austan um páskana.

Alltaf eins?

Veðrið.

Nei.

Fært undir . Engin ummæli »

Fatlaður flugvöllur.

Frétt á RÚV í dag:

“Nýtt stjórnmálaafl, Baráttusamtökin, kynnti stefnu sína í dag. Að hreyfingunni standa annars vegar eldri borgarar og öryrkjar en hins vegar Höfuðborgarsamtökin. Baráttumálin sem sett eru á oddinn eru að bæta stöðu aldraðra og öryrkja og að koma Reykjavíkurflugvelli burt úr miðbænum.

Baráttusamtökin ætla fram í öllum kjördæmum…”

Að sjálfsögðu er það það grundvallaratriði til að efla hag aldraðra og öryrkja á Íslandi að flugvöllurinn verði fluttur úr Vatnsmýrinni í Reykjavík.
Já og líka að Kolbeinsey verði máluð gul. Bætir hag aldraðra og öryrka til muna. Ekki spurning.

Hvurslags dómadags della er þetta eignilega?  Ætlast þetta fólk til þess að einhver kjósi það, að því gefnu að því takist að koma saman framboðslistum?

Það er greinilega fyrirkvíðanlegt að verða mikið eldri en maður er orðinn nú þegar.

Fært undir . Engin ummæli »

Er ekki allt í lagi?

Vegir “guðs” eru víst órannsakanlegir og enn óskiljanlegri eru þeir vegaslóðar sem prestar hinnar íslensku “þjóðkirkju” vafra um í meintri “sálgæslu” sóknarbarna sinna. Einn þeirra, Axel nokkur Árnason, sóknarprestur í Skeiða- og Gnúpverjahreppi sá ástæðu til að senda athugasemd, í nafni embættis síns, til Skipulagsstofnunar þar sem hann tíundaði slæma líðan sóknarbarna sinna vegna fyrirhugaðra virkjanaframkvæmda í neðri hluta Þjórsár í tengslum við fyrirhugaða stækkun álversins í Straumsvík.

Hvað næst? Sendir klerkur bréf til Yfirkjörstjórnar að afloknum kosningum í maí næstkomandi, þar sem hann lýsir áhyggjum sínum vegna ömurlegs sálarástands hluta sóknarbarna sinna vegna hraklegrar útkomu Framsóknarflokksins? Fær UMFÍ tilskrif frá presti að afloknu Unglingalandsmóti á Höfn í sumar þar sem hann tíundar bágt sálarástand keppenda Skeiða- og Gnúpverja í sleggjukasti, þar sem þeir náðu ekki þeim árangri sem þeir stefndu að?

Er ekki á hreinu hvert verksvið þessara opinberu starfsmanna er?

Í “guðanna” bænum haldið ykkur við efnið, prestar! Bara við efnið.

Fært undir . Engin ummæli »

Vælir hann enn!

Það á ekki af “galdrakarlinum” Kristjáni Skerjafjarðar-“skáldi” Hreinssyni (sjá blogg hér að neðan 28.jan. & 27. febrúar) að ganga. Eftir að hafa vælt undan grínfígúrunni Silvíu Nótt í fyrra, vældi hann yfir því að sér væri ekki hampað nógu mikið sem textahöfundi vinningslagsins með Eiríki rauða í íslenskri júróvissijón. Hélt hann virkilega að það væri aðallega verið að velja texta til að senda í evrópska keppni? Hverjum er ekki sama hver semur textann? Enda hefur það nú komið í ljós að höfundur vinningslagsins hefur fengið einhvern Peter Fenner til að semja enskan texta við lagið sem verður flutt á í lokakeppninni í vor. Að sjálfsögðu er skáldið byrjað að væla yfir þessu, enda hafi… “ hann þegar verið búinn að semja enskan texta undir heitinu “To be or not to be”” Frumlegt.
Þetta er haft orðrétt eftir skáldinu: “Ég var spurður að því um daginn, hvernig ég hefði farið að, ef ég hefði ætlað að skapa 400 störf fyrir fólkið á Reyðarfirði, í stað þeirra 400 starfa sem stóriðjan skapar þar í plássi. Ég svaraði og sagði að ég hefði skapað 400 smáfyrirtæki. “ og “Ef hver og einn af þeim 400 sem stofna smáfyrirtæki nær að ráða til sín einn mann, þá er búið að tvöfalda stærð fyrirtækjanna. Og það sem meira er, mín 400 fyrirtæki hefðu ekki þurft neina helv… Kárahnjúkavirkjun. Mín 400 fyrirtæki hefðu skilað þjóðinni raunverulegum arði.”

Þegar skáld eins og þetta ber á borð fyrir almenning í heilum landsfjórðungi annað eins bull sem lausn allra vandamála þar, þá er ekki undarlegt að hroll setji að manni.
Sáldið er svo sívælandi í fjölmiðlum vegna þess að það telur sig ekki njóta sannmælis í einhverri sönglagakeppni.

Ég gæti gubbað!

Fært undir . Engin ummæli »

Smekklaus smekkur.

Alltaf sannfærist ég betur og betur um að sú ákvörðun sem ég tók á unglingsárum að segja mig úr hinni svokölluðu þjóðkirkju hafi verið heillaspor. Sú ákvörðun byggðist reyndar eingöngu á algerum trúarskorti og það hefur ekkert breyst. Ég gat með engu móti verið sáttur við að vera meðlimur í félagi sem ég átti enga samleið með. Þetta var líkt því að halda með Haukum en vera meðlimur í FH og greiða þangað félagsgjöld. Augljóslega galið.

Á ýmsu hefur gengið hjá söfnuði þessum frá því ég sagði mig frá honum, sem hefur sannfært mig um að ég breytti rétt með því að vera ekki bendlaður við hann og sífellt bætir í. Nú er VÍS búið að kaupa skírnarathafnirnar í Grafarvogskirkju. Svona eins og Landsbanka-deildin og DHL-deildin í íþróttunum. Um leið og foreldrar færa ómálga barn með nauðungarflutningi inní söfnuðinn við skírnarathöfn þess, er hengdur slefu-smekkur um háls þess í boði VÍS. Smekklegt?

Ég held ég hringi í félaga minn, umboðsmann VÍS, með það fyrir augum að endurskoða tryggingamál mín hjá þessu “guðdómlega” tryggingafélagi.

Fært undir . Engin ummæli »

Déskotans drullumall.

Nokkrir forstjórar sem sameiginlega stýra fyrirtækjum sem einoka sölu á ákveðinni vöru sammælast um hvernig þeir, í krafti einokunarstöðu sinnar, halda uppi verði á vörunni sem fyrirtækin selja og hvernig þeir skipta á milli sín markaðnum. Markmiðið: Auka hagnað fyritækjanna á kostnað almennings með ólöglegum hætt. Þeir vita að þetta athæfi er ólöglegt og fara því leynt með það. En upp um þá kemst og þeir viðurkenna opinberlega sök sína og gerast meira svo fullir iðrunar að þeir láta fyrirtækin kosta auglýsingar í fjölmiðum landsins þar sem þeir fara fram á fyrirgefningu landsmanna. Fyrirtækin eru sektuð fyrir athæfið. Gerð er tilraun í dómskerfinu til að fá mennina sakfellda fyrir athæfið en það gengur ekki og eru þeir allir þrír lausir allra mála. Að vísu var einn millistjórnandi hrakinn úr embætti og virðist það eini einstklingurinn sem situr uppi með afleiðingarnar. Þórólfur Árnason var hrakinn úr embætti borgarstjóra í Reykjavík. Ég legg til að Villi borgarstjóri sjái sóma sinn, fyrir hönd íhaldsins, og fari uppí Heiðmörk að planta trjám í flagið sem flokksbróðir hans og vinur, bjó þar til. Þar verði hann það sem eftir lifir kjörtímabilsins og Þórólfur taki aftur við starfi borgarstóra. Gleðipinninn Gílsi Mateinn mætti alveg sjá um að moka skítnum undir plöntuhnausana.

Hvurslasg andskotans della er í gangi í þessu þjóðfélagi? Afbrotið er liggur fyrir, þeir sem brutu af sér eru búnir að viðurkenna það persónulega og með opinberum hætti, að þeir hafi verið að taka almenning í rassg…. árum saman. Þeir létu fyrirtækin borga opinbera afsökunarbeiðni í formi dagblaðaauglýsingar þess efnis!

Þessir menn hafa eflaust verið á árangurstengdum launum hjá fyrirtækjunum og hafa því hagnast með beinum og persónulegum hætti á öllu drullumallinu.

Það er gamla íslenska sagan; spörkum skúringakonunni.

Ég hvet austfirðinga til að kaupa eldsneyti hjá Orkunni á Egilsstöðum.

Fært undir . 2 ummæli »

Allur pakkinn

Í góða veðrinu í dag létum við gömlu hjónin verða af því að fá leiðsögn um álverssvæðið á Reyðarfirði. Það var ekki seinna vænna þar sem óðum styttist í verklok. Það voru reyndar hæg heimatökin þar sem leiðsögnin er hluti af starfi dóttur okkar sem þarna hefur unnið nú í næstum eitt ár. Heimsóknin byrjað á því að leggja bílnum eftir kúnstarinnar reglum og horfa á stutta kynningu á framkvæmdinni á skjá hjá öryggisverði við innganginn á svæðið. Því næst var okkur úthlutað gestapassa sem hegdur var um hálsinn á okkur, öryggisgleraugu afhent, en við sluppum við eiturgulu vestin og stáltáaklossana þar sem við lofuðum að fara ekki út úr bílnum sem dóttir okkar ók um svæðið. Toyota með gulu blikkljósi og bakkflautu. Áður en við fengum að hefja ferðina var mér tjáð að ég hefði lent í tilvjunakenndu úrtaki og ætti að mæta í vínandapróf á þar til gerðri stofnun í næsta nágrenni. Rallhálfur ferðu ekki inná svæðið. Á móti okkur tóku tvær konur. Mér var boðið til herbergis hjá þeirri yngri og hvarf þar inn á meðan þær mæðgur biðu eftir mér með bros á vör. Þetta var hin þægilegasta kona og útlistaði fyrir mér hvernig áfengisprófið færi fram með blæstri í þar til gert tæki. Ég lofaði að blása ekki of fast og niðurstan var sú að ég var allsgáður, sem ég og vissi. Þá dró hún fram svarta pokaskjatta og bað mig að draga eina af mörgum kúlum úr pokanum. Ég fálmaði ofaní pokann og upp kom rauð kúla. “Jæja….” sagði unga konan. “Þetta táknar að þú þarft að gangast undir eiturlyfapróf.”
Ég hef rauðhærða dóttur mína grunaða um að hafa sett þetta allt á svið. Tilviljunarkennt úrtak.. hvað! “Rauða kúlan táknar eiturlyfjapróf….” ég er viss um að allar kúlurnar í pokanum voru rauðar.

Ég slapp í gegnum skoðunarferðina án frekari hremminga.
Takk fyrir túrinn.

Fært undir . 2 ummæli »

Ofsavitleysa

Hvernig má það vera að menn æða inná miðhálendi Íslands, fyrrihluta marsmánaðar á jeppum og snjósleðum, þrátt fyrir að nánast ofsaveðri sé spáð á svæðinu. Þetta veður kom ekki á óvart, því var spáð með löngum fyrirvara. Ég hefði haldið að þeir sem eiga tæki á borð við breytta fjallajeppa og snjósleða eigi líka útvarp og geti því fylgst með veðurspám. Jafnvel gætu þeir líka átt nettengdar tölvur eða haft aðgang að þeim. Með þeim búnaði er hægt að fylgjast með veðri víða um hálendið.  Könnuðu þessir menn virkilega ekki veðurspá áður en lagt var af stað.  Ef þeir hafa ekki gert það, er um makalaust fyrirhyggjuleysi að ræða og hafi þeir kannað veðurútlit, en farið samt, er um þvílíkan dómgreindarskort og glannaskap að ræða að engu tali tekur. Hvort sem er, þetta framferði er einfaldlega ofsavitleysa, sem verður þess valdandi að stór hópur fólks fer í frítíma sínum að leita þessara manna og leggur sig í hættu við það, auk þess sem verulegt tjón verður á búnaði björgunarsveitanna.
Þetta er ekki í fyrsta sinn sem þetta gerist.
Ætlar þessari ofsaheimsku aldrei að linna?

Fært undir . Engin ummæli »

Grænt hægri blóð?

Jæja, seint ætlar skemmtilegum uppákomum að fækka, sem betur fer. Nú styttist í að nýr flokkur komi fram á sjónarsviðið og bjóði fram til Alþingiskosninga í vor. Tveir hafa verið nefndir í efstu sætin í Reykjavík. Annarsvegar grínarinn Ómar Ragnarsson og hins vegar sú sem tapaði í kosningu um varaformannsembættið í Frjálslinda flokknum, Margrét Sverrisdóttir. Einnig hefur heyrst að Stuðmanna-spjátrungurinn Jakob Frímann Magnússson, sem náði ekki frama í Samfylkingunni og fór þaðan í fýlu, stefni ofarlega á einhvern listann hjá þessum óstofnaða flokki. Hann hafði reyndar tekið sömu stefnu í Samfylkingunni, nokkrum sinnum en taldi að “flokkurinn hafi fjarlægst sig” . Mig skal ekki undra.

Er það trúverðugt að stilla upp í efstu sætin fólki sem æðir flokka á milli í örvæntingarfullri leit að leiðum til að komast á þing? Eða fréttamönnum sem hafa í áraraðir flutt fréttaefni af heitustu deilumálum þjóðarinnar, koma síðan skyndilega út úr skápnum með einarðar og fullmótaðar skoðanir á annan veginn og fullyrða að þeir hafi allan tímann verðið hlutlausir? Hrópa að náttúrunni blæði. Svo verða menn bara heilagir í framan og þiggja átta milljónir í styrk frá höfuðandstæðingnum, Landsvirkjun þegar þeir eru að komast í þrot með hugðarefni sín!

Gæti verið að Bubbi Morthens sé líka á leiðinni í þetta framboð? Hann uppfyllir skilyrðið. Hann er frægur. (Nú er betra að fara varlega svo maður verði ekki lögsóttur.) VAR dópari og hætti. Hann varð frægur bæði af því að hafa dópað og af því að hafa hætt. Hann var skotveiðimaður og hætti. Hann varð frægur af því að hafa skotið rjúpu og gæs og varð einnig frægur af því að hafa hætt því. Hann elskaði Brynju og hætti því. Hann varð frægur af því að hafa elskað Brynju og hann varð frægur af því að hafa hætt því. Um allt þetta mátti lesa í læknabiðstofuritinu Séð og heyrt. Hann telur sig mikinn náttúruverndarmann. Líklega var það ástæðan fyrir því að hann fékk nóg af blóðbaðinu í kringum rjúpna- og gæsaveiðar. En það er ekki allt blóð eins. Hann er einn af þessum “veiðimönnum” sem stunda það að veiða/sleppa. Þessir menn eru ekki að veiða sér í matinn, nei “veiðimennskan” byggist á því að fara til lax- og silungsveiða, koma önglinum í fiskinn, þreyta hann þar til hann er orðinn örmagna og hægt að ná honum á land, kroppa öngulinn úr kjaftinum á fiskinum og sleppa honum síðan svo hægt sé að endurtaka leikinn. Þess utan hefur hann og umræddur Ómar takmarkalausan áhuga á boxi. Þeir hafa orði frægir á Íslandi fyrir það. Í boxi berja fullorðnir menn á stuttbuxum hvor á öðrum. Þeir fá því fleiri stig sem höggin rata oftar í höfuð og búk andstæðingsins. Afleiðingarnar; mönnum blæðir, þeir vankast, þeir rotast og þeir drepast.

Nei, það er ekki allt blóð eins.

Fært undir . Engin ummæli »

Mun hann mótmæla?

Nú þegar ljóst er orðið að tilgangur kaupa Marels hf. á hátæknifyrirtækinu Póls á Ísafirði var einungis sá að komast yfir keppinaut, segja upp rúmlega 20 manns,  leggja starfsemina af á Ísafirði og flytja hana suður, vaknar ein spurning. “Hátækni”-eitthvað á að koma í stað álvera á landsbyggðinni skv. kenningum Vinstri grænna.  Mætir hluthafinn Steingrímur J. Sigfússon á aðalfund Marel hf. og mótmælir þessu ráðslagi?
Ég bíð spenntur.

Fært undir . Engin ummæli »

Brandari aldarinnar?

Haft eftir Jóni Sigurðssyni, formanni Framsóknarflokksins og Guðna Ágústssyni, varaformanni sama flokks á Alþingi: “Framsóknarflokkurinn mun beita sér að öllu afli fyrir því að tekið verði ákvæði inn í stjórnarskrá um sameign þjóðarinnar á auðlindum sjávar.”  Ha, ha, ha, ….  Framsóknarflokkurinn……  ha, ha ha.  Áttu annan?!

Fært undir . 3 ummæli »

Væll og skæll

Mikið jókst nú kjörþokki Samfylkingarinnar þegar spjátrungurinn Jakob Frímann yfirgaf flokkinn. Ég hef ekki heyrt neinn gráta brotthvarfið.
Ég heyrði þó “Skerjafjarðarskáldið” og  galdrakarlinn Kristján Hreinsson væla. Hann vældi þó yfir öðru, enda í Vinstri Grænum. Hann samdi textann í vinningslaginu í undankeppni “Júróvisjón”nú fyrir skemmstu, en tárin komu til af því að honum þótti textahöfundum ekki gert nógu hátt undir höfði eða þeim ekki hampað nægilega. Í fyrra hágrét hann yfir hinni tilbúnu persónu Silvíu Nótt. Þetta er erfitt líf, þetta skáldalíf.

Fært undir . 1 ummæli »

Nágrannanjósnir

Jæja, þá er einum valkostinum færra við Alþingiskosningarnar í vor. Gríman datt af formanni Vinstri grænna í sjónvarpinu í dag og við blasti gamalkunnugt andlit. Berstípaður kommúnistinn Steingrímur J. Sigfússon vill koma á ritskoðun á Íslandi. Kemur svo sem ekki á óvart í ljósi sögunnar! Fyrsta skref hans er lögreglusveit á vegum ríkisins sem á að ritskoða efni Internetsins ofaní Íslendinga. Það er gagn að svona menn komist ekki til valda á Íslandi. Menn sem koma með svona yfirlýsingar fyrir kosningar, verða ekki stöðvaðir ef þeir setjast í ríkisstjórn. Þeir munu ganga enn lengra fái þeir aðstöðu til. Það hefur sagan sýnt, hér á landi og annarsstaðar. Þá er stutt í símahleranir og nágrannanjósnir. Hafa menn ekkert lært? Steig rússnesk kosning formannsins, nú um helgina, honum svona til höfuðs? Er ekki rétt að slaka þessum nýkjörna flokksformanni til Kína? Þangað hefur hann eflaust sótt fyrirmyndina að þessari arfavitlausu og stórhættulegu fyrirætlan sinni.

Fært undir . Engin ummæli »

Hátækniplástur

Það ætlar að ganga illa með þetta “eitthvað annað” í stað álveranna. Hvernig hljómar þetta: “ Rúmlega 600 manns hjá hátæknifyrirtækjum í Reykjavík sagt upp.” Illa? Nú er það? Það var liðlega 20 manns sagt upp á Ísafirði hjá því margumtalaða og margrómaða fyrirtæki Marel. Þetta er sama hlutfall af íbúafjölda þessara staða. Þetta fyrirtæki keypti upp rótgróið fjölskyldufyrirtæki, Póls, á Ísafirði fyrir nokkrum árum. Þetta fyrirtæki hefur ætíð borið á góma þegar andstæðingar atvinnuuppbyggingar á austurlandi hafa farið hamförum yfir Kárahnjúkavirkjun og bygginu álvers á Reyðarfirði. Hátæknifyrirtæki í líkingu við Marel og Össur áttu að leysa allan vanda. Ál var vont. Það var notað í vopn og annað tengt hernaði. Hátækni- og sprotafyrirtæki áttu að koma þess í stað. Eitt þessara íslensku fyrirtækja framleiddi dvergkafbát og seldi hann herjum um víðan völl. Það olli miklum hugaræsingi að ræða það opinberlega. Ég ætla að hætta mér út á svipaða braut. Íslenskt sprotafyritæki í hátæknigeiranum hefur hafið framleiðslu á plástrum (sáraumbúðum) sem eru þeirrar náttúru að sár gróa hraðar en nokkru sinni áður. Hver ætli sé nú helsti kaupandi þessarar hátækni- og sprota-framleiðslu? Nema hvað: Innrásarherinn í Írak! Miklir menn erum vér Íslendingar! Stuðlum að því að koma hermönnum sem fyrst í gagnið, svo þeir geti sem fyrst hafið sína vinnu á ný; að drepa fólk.

Já, hátæknin og sprotinn er augljóslega að stuðla að miklum og jákvæðum framförum á Íslandi.
Ekki síst “úti á landi”.

Fært undir . Engin ummæli »

Þeir þungu fyrst!

Alltaf þykir mér jafn sérkennilegt að hlusta á símsvara hjá hinum ýmsu fyrirtækjum og stofnunum þegar kemur að þessum kafla: “Því miður eru allar línur uppteknar, en símtölum verður svarað í réttri röð.” En ekki hvað? Ekki geta þeir svarað eftir hæð eða þyngd þess sem hringir, því miður fyrir mig.

Það sama á við þegar auglýst er: “Símtalið kostar 199 krónur og verður upphæðin dregin frá símreikningnum.” Ég hvet alla til að hringja amk. 100 sinnum í þau símanúmer sem auglýst eru þannig. Með því móti er hægt að eyða símreikningunum sínum ef eitthvað er að marka það að þessi kostnaður verði dreginn frá.

Fært undir . Engin ummæli »

Sól í Saur?

Hvernig væri nú að samtökin Sól í Straumi eyddu smávegis tíma og fyrirhöfn í að koma vitinu fyrir þann hluta skoðanabræðra sinna sem harðast berjast gegn stækkun álversins í Straumsvík og skemmdu þrjá vinnuvélar á vegum Ístaks. Menn halda að skemmdarvargarnir hafi talið þessar vinnuvélar nú þegar komnar í vinnu við stækkun álversins. Er þetta lið ekkert að fylgjast með fréttum og almennum umræðum um þau málefni sem eru þeim svo kær? Í ljós koma að viðkomandi vinnuvélar voru að ganga frá skólphreinsistöð í Hraunsvík.

Eða er þetta allt saman misskilningur. Er þessi hópur ef til vill á móti skólphreinsistöðvum.

Allt náttúrulegt, upp með föturnar og kamar við hvert hús.

Oj.

Fært undir . Engin ummæli »